IRUSHANWA RYA TDS 2026: FERWAFA ISHIMANGIRA IMYITEGURO, AMAKIPE ASABWA KWITEGURA NEZA
Ishyirahamwe ry’Umupira w’Amaguru mu Rwanda, FERWAFA, ryakoze inama ikomeye yo kwitegura irushanwa rya TDS 2026, rihuriza hamwe abahagarariye amakipe yose azaryitabira. Iyi nama yabereye ku cyicaro cy’iri shyirahamwe giherereye i Remera, igamije kunoza no guhuza imitegurire y’iri rushanwa ritegerejwe na benshi.
Irushanwa rya TDS rikorwa ku bufatanye na FIFA binyuze muri gahunda yayo ya Talent Development Scheme, igamije kuzamura impano z’abakiri bato mu mupira w’amaguru.
GUSHYIRA UMUCYO KU MATEGEKO N’IMIGENDEKERE Y’IRUSHANWA
Mu byaganiriweho cyane harimo amategeko azagenga irushanwa, uko imikino izakinwa n’ingengabihe yayo. Abahagarariye amakipe basobanuriwe uburyo buri mukino uzagenda, uko amanota azabarwa ndetse n’amahame azubahirizwa kugira ngo irushanwa rizagende neza kandi mu mucyo.
FERWAFA yashimangiye ko kubahiriza amategeko ari bwo shingiro ry’iterambere rirambye ry’umupira w’amaguru, cyane cyane mu cyiciro cy’abato.
IMISIFURIRE N’IMITEGURIRE Y’ABASIFUZI
Indi ngingo y’ingenzi yaganiriweho ni iy’imisifurire. Hatanzwe ibisobanuro ku buryo abasifuzi bazatoranywa no ku myiteguro bazahabwa mbere y’uko irushanwa ritangira. Ubuyobozi bwagaragaje ko hagamijwe imisifurire inoze kandi itabogamye, izatuma amarushanwa agira isura nziza.
INKUNGA KU MAKIPE AZITABIRA
Mu rwego rwo gushyigikira amakipe, hasobanuwe uburyo azahabwa inkunga izabafasha mu bijyanye n’ingendo, imyitozo ndetse n’ibikoresho. Ibi bigaragaza ubushake bwo guteza imbere impano hakiri kare, hatitawe ku bushobozi bw’amafaranga bw’ikipe runaka.
INDI NTAMBWE MU ITERAMBERE RY’UMUPIRA W’ABATO MU RWANDA
Nyuma yo gusobanura neza ibijyanye n’imikorere n’ibya tekinike, ubuyobozi bwa FERWAFA bwatangaje ko bwizeye ko irushanwa rya TDS 2026 rizaba urubuga rwo kugaragaza impano nshya zizavamo abakinnyi bakomeye mu gihe kiri imbere.
Iyi gahunda ya Talent Development Scheme igamije gushyiraho umusingi ukomeye w’iterambere ry’umupira w’amaguru w’abato, binyuze mu gutahura, gutoza no gukurikirana impano hakiri kare.
Abitabiriye inama basoje biyemeje gukorana bya hafi n’ubuyobozi kugira ngo irushanwa rizatangire ku wa 7 Werurwe rizagende neza kandi rigire umusaruro ufatika.
Mu gihe imyiteguro irimbanyije, abakunzi b’umupira w’amaguru bategerezanyije amatsiko irushanwa rya TDS 2026, rizaba indi ntambwe igaragaza umuhate wo kubaka ejo hazaza h’umupira w’amaguru mu Rwanda.
Byanditswe na Igiraneza Migisha Janviére
