SIMBA QUEENS YIHANIJE YANGA PRINCESS

Ikipe ya Simba Queens yakomeje kwerekana ko ari imwe mu makipe akomeye mu mupira w’amaguru w’abagore muri Tanzaniya nyuma yo gutsinda Yanga Princess ibitego 2-1 mu mukino wa shampiyona y’abagore ya 2025/2026 wabaye urimo guhangana gukomeye.

Uyu mukino watangiye amakipe yombi akinana imbaraga nyinshi ashaka kubona amanota atatu y’ingenzi. Simba Queens yinjiye mu kibuga ifite icyizere imbere y’abafana bayo, ibintu byayifashije gusatira kenshi mu minota ya mbere y’umukino. Nyuma y’igitutu gikomeye, Jentrix Shikangwa yafunguye amazamu atsinda igitego cya mbere cyashimishije abafana ba Simba Queens.

Yanga Princess ntiyacitse intege kuko yakomeje gushaka uburyo bwo kwishyura. Mu minota yakurikiyeho, Nabbosa Retticia yaboneye ikipe ye igitego cyo kwishyura nyuma y’umupira mwiza wari uvuye hagati mu kibuga, bituma umukino urushaho gukomera.

Mu gice cya kabiri, Simba Queens yongeye gukina umukino wihuta ndetse igaragaza ubushake bwo kurangiza umukino hakiri kare. Jentrix Shikangwa yongeye kwigaragaza atsinda igitego cya kabiri cyahesheje ikipe ye intsinzi y’ingenzi, aba umukinnyi w’umukino kubera uburyo yitwaye neza.

Uyu mukino waranzwe n’ishyaka, guhangana ndetse n’ubwitange bw’abakinnyi ku mpande zombi, ibintu byashimishije abakunzi b’umupira w’amaguru w’abagore muri Tanzaniya.

Byanditswe na Igiraneza Migisha Janviére