RAYON SPORTS WFC NA POLICE WFC MU IHANGANA RIKOMEYE RYO KWEGUKANA IGIKOMBE CYA SHAMPIYONA Y’ABAGORE

‎

‎Shampiyona y’icyiciro cya mbere mu mupira w’amaguru w’abagore mu Rwanda, Rwanda Women’s Super League, irimo kugana ku musozo wayo aho amakipe akomeje guhatanira imyanya myiza ku rutonde. Nyuma y’imikino y’umunsi wa 19 yabaye tariki ya 7 na 8 Werurwe 2026, ihangana rirushaho gukomera cyane cyane mu makipe ayoboye urutonde.

‎

‎Ku mwanya wa mbere hakomeje kwicara Rayon Sports WFC ifite amanota 45 mu mikino 18, ikaba ikurikiwe bya hafi na Police WFC nayo ifite amanota 45 ariko igasigwa inyuma n’umwenda w’ibitego. Ibi bituma ihangana hagati y’aya makipe yombi rirushaho gukomera, cyane ko umukino wari uteganyijwe kuyahuza kuri uyu munsi wa shampiyona wasubitswe, ibintu byatumye abakunzi b’umupira w’amaguru bategereza n’amatsiko menshi igihe uzakinirwa.

‎

‎Ku mwanya wa gatatu haza Indahangarwa WFC ifite amanota 42, nyuma yo kunganya igitego 1–1 na AS Kigali WFC mu mukino w’umunsi wa 19. Nubwo kunganya byatumye igabanya umuvuduko wo gukurikira amakipe ya mbere, iracyafite amahirwe yo gukomeza guhatanira imyanya yo hejuru mu mikino isigaye.

‎

‎Ku rundi ruhande, APR WFC yakomeje kwitwara neza itsinda Forever WFC ibitego 3–1, iguma ku mwanya wa kane n’amanota 37. Intsinzi ya APR WFC yagaragaje ko iri mu makipe ashobora gutungurana mu mikino isigaye, cyane cyane mu gihe yakomeza kwitwara neza.

‎

‎Mu yindi mikino yabaye, Kamonyi WFC yatsinze Nyagatare WFC ibitego 2–0, mu gihe Bugesera WFC nayo yatsinze Muhazi United WFC ibitego 4–1. Umukino wahuje Inyemera WFC na Macuba WFC warangiye amakipe yombi anganyije ubusa ku busa (0–0).

‎

‎Ku gice cyo hasi cy’urutonde, Nyagatare WFC ikomeje kugira ibihe bitoroshye muri iyi shampiyona kuko iri ku mwanya wa nyuma nta nota na rimwe ifite nyuma y’imikino 19 imaze gukina. Ibi bituma amahirwe yo kuguma mu cyiciro cya mbere arushaho kugabanuka, nubwo ishobora gukomeza kurwana mu mikino isigaye.

‎

‎Mu gihe shampiyona igenda igana ku musozo, abakunzi b’umupira w’amaguru mu Rwanda bakomeje gukurikira n’amatsiko menshi uko amakipe azitwara mu mikino isigaye, cyane cyane ihangana riri hagati ya Rayon Sports WFC na Police WFC rishobora kuzagena uzegukana igikombe cya Rwanda Women’s Super League uyu mwaka.

‎

‎Byongeye kandi, iyi shampiyona igaragaza ko umupira w’abagore mu Rwanda ukomeje gutera imbere, aho amakipe menshi arimo kugaragaza urwego rwiza n’ishyaka rikomeye mu kibuga. Abakinnyi b’abagore barushaho kwigaragaza, bigatuma iri rushanwa rikurura abakunzi benshi b’umupira w’amaguru m'ubari n'abategarugo ndetse rikongera icyizere cy’iterambere ry’umupira w’abagore mu Rwanda mu myaka iri imbere. 

‎

‎

‎Byanditswe na Igiraneza Migisha Janviére