APR WOMEN VOLLEYBALL CLUB NA KEPLER WOMEN VOLLEYBALL CLUB ZIHANZE AMASO FINALE YA KAMARAMPAKA
Mu mikino ya kamarampaka ya shampiyona y’icyiciro cya mbere mu bagore itegurwa na Rwanda Volleyball Federation, ibintu birushaho gufata indi ntera aho amakipe ya APR wvc na Kepler WVC akomeje kwigaragaza nk’afite inyota yo kugera ku mukino wa nyuma (finale).
Ku mukino wa kabiri wa ½ cy’irangiza (Game 2), ikipe ya APR wvc yongeye kwerekana ko ari imwe mu makipe akomeye cyane muri shampiyona, itsinda RRA wvc amaseti 3-0 (25-12, 27-25, 25-16). Ni umukino APR wvc yatangiye ifite imbaraga zidasanzwe, igaragaza ubuhanga mu kwakira imipira no kuyitera neza.
APR wvc yihariye umukino, RRA wvc irwana no kwigaragaza
Nubwo iseti ya mbere yarangiye APR wvc iyoboye kure, mu iseti ya kabiri RRA wvc yagerageje kugaruka mu mukino, igaragaza ubushake bwo guhangana. Icyakora, ubunararibonye bwa APR wvc bwaje kuyifasha kwitwara neza mu bihe bikomeye, iyegukana ku manota 27-25. Mu iseti ya gatatu, APR wvc yongeye kugaragaza ko ifite umukino uhamye, isoza akazi nta kuzuyaza.
Ku rundi ruhande, ikipe ya Kepler wvc nayo ntiyigeze itenguha abafana bayo, aho yatsinze Police wvc amaseti 3-0 (26-24, 25-23, 25-19). Uyu mukino wari wuzuyemo ihangana rikomeye cyane, cyane cyane mu maseti abiri ya mbere.
Kepler wvc yerekanye umutima n’imbaraga mu bihe bikomeye
Police wvc yagerageje gukina umukino ukomeye, isatira Kepler wvc ku manota mu buryo bugaragara. Ariko Kepler wvc igaragaza ubwitange n’ubufatanye bw’abakinnyi bayo, ibasha gutsinda amaseti abiri ya mbere ku manota yegeranye cyane. Mu iseti ya gatatu, Kepler wvc yakomeje gukina ifite icyizere, isoza umukino neza.
Ihangana rirakomeje, amakipe yiteguye intambara ya nyuma
Iyi mikino yagaragaje ko nta kipe izoroherwa mu mikino ikurikiyeho, kuko buri wese ari gushaka itike yo kugera ku mukino wa nyuma. APR WVC na Kepler WVC zombi zigaragaje ko zifite ubushobozi n’inyota yo kwegukana igikombe.
Abakunzi ba volleyball y'abagore bakomeje gukurikirana aya marushanwa bafite amatsiko menshi, bategereje kureba niba aya makipe azakomeza uyu muvuduko cyangwa niba hazabaho impinduka zitunguranye.
Byanditswe na Igiraneza Migisha Janviére
