FOREVER WFC ITSINDIRA BUGESERA WFC IWAYO, ISOZA SHAMPIYONA N’INTSINZI NUBWO IRI INYUMA KU RUTONDE

‎

‎Ku munsi wa 22 wa Rwanda Women’s Super League, ikipe ya Bugesera WFC yakiriye Forever WFC mu mukino wasojwe n’intsinzi ya Forever WFC y’igitego 1-0. Nubwo wari umukino wo gusoza shampiyona, amakipe yombi yagaragaje ihangana rikomeye n’ishyaka ryinshi kugeza ku munota wa nyuma.

‎

‎Umukino watangiye Bugesera WFC isatira ishaka gukoresha amahirwe yo gukinira imbere y’abafana bayo, ariko Forever WFC igaragaza ubwirinzi buhamye ndetse n’imikinire ituje. Ibi byatumye igice cya mbere kirangira nta kipe ibashije kubona igitego, nubwo uburyo bwagiye buboneka ku mpande zombi.

‎

‎Mu gice cya kabiri, Forever WFC yaje kubona igitego rukumbi cy’umukino nyuma yo gukoresha neza amahirwe yabonye imbere y’izamu. Iki gitego cyahinduye isura y’umukino, Bugesera WFC ishyiraho igitutu ishaka kwishyura, ariko kubura amahirwe no kudakoresha neza ayo yabonye bituma umukino urangira itabonye igitego.

‎

‎Nubwo aya makipe yombi atari mu myanya yo hejuru, umukino wagaragaje ko buri kipe yari ifite inyota yo gusoza neza shampiyona. Abakinnyi bagaragaje imbaraga, ubwitange n’ishyaka, bituma umukino urushaho kuryohera abawukurikiye.

‎

‎Nyuma y’uyu mukino, Bugesera WFC yasoreje ku mwanya wa 8 n’amanota 24 ndetse n’ibitego -9, mu gihe Forever WFC yarangije iri ku mwanya wa 9 n’amanota 20 ndetse n’ibitego -19. Nubwo Forever WFC yatsinze umukino wa nyuma, Bugesera WFC yagumye imbere ku rutonde rusange.

‎

‎Uyu mukino usoje shampiyona wagaragaje ko n’amakipe ari inyuma ku rutonde ashobora gutanga imikino ikomeye kandi irimo ihangana rikomeye. Ni ikimenyetso cy’uko shampiyona y’abagore mu Rwanda ikomeje gutera imbere, aho buri kipe igaragaza ubushake bwo kurushaho kwitwara neza mu bihe biri imbere.

‎

‎Byanditswe na Igiraneza Migisha Janviére