RAYON SPORTS WFC YANYOMOJE AS KIGALI WFC, IKOMEZA GUSIGARA KU ISONGA RYA SHAMPIYONA

‎

‎Rayon Sports WFC 6-0 AS Kigali WFC: Intsinzi ikomeye ishimangira ubuyobozi bwa shampiyona

‎

‎Ku munsi wa 18 wa Shampiyona y’Icyiciro cya Mbere mu bagore, ikipe ya Rayon Sports WFC yerekanye urwego ruri hejuru itsinda ibitego 6-0 AS Kigali WFC mu mukino wabereye mu murwa mukuru.

‎

‎Ni umukino watangiye ku muvuduko wo hejuru ku mpande zombi, buri kipe ishaka kwiharira iminota ya mbere. Nubwo AS Kigali WFC yagerageje kugaragaza imbaraga no gusatira, Rayon Sports WFC ni yo yafunguye amazamu hakiri kare, bituma umukino uhindura isura.

‎

‎Ku munota wa 11, Mukagatete Emeline yafunguye amazamu atsindira Rayon Sports WFC igitego cya mbere, igitego cyahise gituma ikipe irushaho kugira icyizere. Ntibyatinze kuko ku munota wa 34, Niyonshuti Emmerance yatsinze igitego cya kabiri, ashimangira ko Rayon Sports WFC yaje ishaka intsinzi nta kabuza.

‎

‎AS Kigali WFC yakomeje kugerageza gusubira mu mukino, ariko ubusatirizi bwa Rayon Sports WFC bukomeza kubashyira ku gitutu gikomeye.

‎

‎Mbere gato y’uko igice cya mbere kirangira, ku munota wa 45, Ukwinkunda Jeannette yatsinze igitego cya gatatu, igice cya mbere kirangira Rayon Sports WFC iyoboye umukino n’ibitego 3-0.

‎

‎Mu gice cya kabiri, Rayon Sports WFC yakomeje gusatira idacogora. Ku munota wa 48, Mukagatete Emeline yongeye gutsinda igitego cya kane, aba atsindiye ikipe ye ibitego bibiri muri uyu mukino.

‎

‎Ku munota wa 64, GIKUNDIRO Scholastique yatsinze igitego cya gatanu, umukino uba nk’uwamaze guca amarenga y’intsinzi. AS Kigali WFC yakomeje kurwana no gushaka igitego cy’impozamarira, ariko ubwugarizi bwa Rayon Sports WFC bukomeza kuba ibamba.

‎

‎Ku munota wa 87, Odette Coralie Ngwema yatsinze igitego cya gatandatu, ashyiraho akadomo ku ntsinzi ikomeye ya Rayon Sports WFC.

‎

‎Iyi ntsinzi ishimangira ko Rayon Sports WFC iri mu bihe byiza cyane, ikaba ikomeje kuyobora urutonde rwa shampiyona by’agateganyo. Abakinnyi n’abatoza bagaragaje ubufatanye n’imikinire itajegajega, ibintu biyifasha gukomeza kuguma ku isonga.

‎

‎Nubwo AS Kigali WFC yatsinzwe ibitego byinshi, yagaragaje guhangana no kutadohoka, gusa amahirwe abonetse ntiyabyazwa umusaruro. Uyu mukino werekanye itandukaniro ry’imbaraga no gukoresha neza amahirwe ku ruhande rwa Rayon Sports WFC.

‎

‎Shampiyona irarushaho gushyuha uko igana ku musozo, aho buri kipe ishaka gukusanya amanota ashoboka yose.

‎

‎Byanditswe na Igiraneza Migisha Janviére