Volleyball y’u Rwanda yahawe umurongo wo gusatira Afurika
Ikipe y’igihugu y’u Rwanda ya Volleyball y’abagore yakiriwe n’Umuyobozi ushinzwe Siporo mu Rwanda, Nelly Mukazayire, nyuma yo kugaruka mu gihugu ivuye mu irushanwa rya CAVB Africa Women’s Nations Championship 2026, aho yasoreje ku mwanya wa kane muri Afurika.
Nubwo igikombe cyari intego nyamukuru, umwanya wa kane wabaye ikimenyetso gikomeye cy’uko Volleyball y’abagore mu Rwanda iri kuzamuka kandi ishaka guhindura amateka yayo ku ruhando rw’Afurika.
Mu butumwa bwatanzwe mu kwakira aba bakinnyi, Minisitiri Nelly Mukazayire yabashimiye umuhate bagaragaje, ariko abibutsa ko urugamba rutarangiye. Yavuze ko intego y’u Rwanda atari ukugaragara gusa mu marushanwa, ahubwo ari ugukomeza gutera imbere kugeza ubwo ikipe izajya ihatanira imyanya ya mbere.
Yagize ati: “Turabashimira ku mikinire yanyu. Turabizi ko gutwara igikombe ari byo byari intego yacu nyamukuru, ariko no kurangiza ku mwanya wa kane muri Afurika ni umusaruro twishimira.”
Ibi byatumye ubutumwa bukomeye burushaho kugaragara: umwanya wa kane si iherezo, ahubwo ushobora kuba intangiriro y’urugendo rushya rwo gushaka umwanya ukomeye ku mugabane wa Afurika.
Minisitiri yakomeje avuga ko yifuza kubona ikipe y’u Rwanda iri kuri podium mu irushanwa ritaha rya CAVB Africa Championship, ashimangira ko abakinnyi bafite ubushobozi bwo kubigeraho.
Ati: “Turashaka kubabona kuri podium mu irushanwa ritaha rya CAVB Africa Championship kuko ubwo bushobozi murabufite.”
U Rwanda rwiteguye urugamba rurerure
Mu gihe andi makipe yo muri Afurika na yo ari gutegura amarushanwa ataha, Minisitiri yavuze ko u Rwanda rugomba gukorana bya hafi n’abakinnyi, Federasiyo ndetse n’umutoza mukuru kugira ngo hashyirweho gahunda izafasha ikipe gutera indi ntambwe.
Yagize ati: “Ni inshingano zacu gukorana namwe, Federasiyo ndetse n’umutoza mukuru kugira ngo tubafashe kugera kuri urwo rwego. Turabizi ko bishoboka.”
Ni amagambo ashobora gufatwa nk’ikimenyetso cy’uko u Rwanda rushaka kuzamura igitutu mu kibuga, kuko nyuma yo kugera muri bane ba mbere muri Afurika, intego iri kuzamurwa ikagera ku rwego rwo guhatanira imidali.
“Ntimuruhuke!”
Abakinnyi basabwe gusubira mu makipe yabo, ariko batagomba gufata umwanya wo kuruhuka ku buryo bwatuma batakaza umurego.
Minisitiri yabasabye gusubira mu makipe, kongera ingufu no gukomeza gukora cyane, kuko urugendo rwo kwitegura irushanwa ritaha rutangira mbere y’uko irushanwa nyirizina rigera.
Hateganywa kandi ko Federasiyo izakorana n’abatoza kugira ngo abakinnyi babone umwanya uhagije wo kongera gukorana n’umutoza mukuru. Ibi bishobora gufasha ikipe gukomeza kubaka uburyo bumwe bwo gukina, kongera imikoranire no gukomeza kunoza imyiteguro.
Yavuze ko imyitozo ihuriweho ishobora gutegurwa buri byumweru bike cyangwa buri kwezi, bitewe na gahunda izashyirwaho.
Impano nto zitegerejweho ejo hazaza
Uretse abakinnyi basanzwe bagize ikipe y’igihugu, hanashimangiwe ko impano zikiri nto zigomba guhabwa umwanya.
Minisitiri Nelly Mukazayire yavuze ko hakwiye gukomeza gushakwa, gutezwa imbere no gutegurwa abakinnyi bakiri bato kugira ngo bazabe igice cy’ahazaza h’ikipe y’igihugu.
Ibi birerekana ko intego atari ikipe iriho gusa, ahubwo ko hateganywa kubaka urufatiro rukomeye rwa Volleyball y’u Rwanda, ku buryo impano nshya zizajya zisimbura abakinnyi bakuru igihe nikigera.
Umwanya wa kane u Rwanda rwarangijeho muri CAVB Africa Women’s Nations Championship 2026 ushobora kuba ari igice kimwe gusa cy’inkuru ndende. Ubu amaso ahanzwe ku cyiciro gikurikira, aho ikipe y’u Rwanda izaba ishaka kwerekana ko ntiyagiye muri bane ba mbere ngo ihagararire aho, ahubwo ko ishaka kurushaho gusatira hejuru.
Volleyball y’u Rwanda iracyafite urugendo, ariko ubutumwa bwatanzwe burasobanutse: imbaraga zigomba kwiyongera, impano zikomeze gutezwa imbere, naho podium ibe intego y’urugendo rutaha.
Byanditswe na Igiraneza Migisha Janviere
